سودانا يصبح كل شى
كتبهاالخير محجوب ، في 29 سبتمبر 2008 الساعة: 10:51 ص
سودانا يصبح كل شى
استهلال
عزك ياوطن شايلنو فى حدق العيون مشروع امان
فى قلب ولدا فطن
شمر سواعد جدو قاصد للدفاع الشعبى
مجبول بيه مكتول فيه حن
ولدا همام من تب قام ماكل قلبو ولا وهن
شايل هموم وطنو التزام فى عقيدتو مركوز مامحن
——–
زين الشباب بى عزمو يفتح الف باب
عزة ومهابة وانتساب
لى صحبة منسابة انسياب
فيها التبتل والنجى
مدفوعة بى حب النبى
والهامة اعلى من السحاب
تبنيه وطنك يا شباب
وبالفكرة تجتازوا الصعاب
——-
سلاحنا الشعبى ليه نعبى
كل الخلوق تشهد تجى
تلقى البلد مسنودة بالشعب الابى
دفاعنا الشعبى يا هو دى
——
ولدا تمام خاتى الملام
ساعة الحساب
قلب امو مشدود بى كلام
مافيه علة تدور جواب
بى ذكرو حافيها السلام
ما الله ملهما بالصواب
صابرة ومرابطة على الدوام
مشفوعة بى حسن الخطاب
ما امو العزيزة بتشتهى
بى عزو متشهل يجى
وكتين يجى دنياها بتزغرد حباب
——
يا امة فى وسط العذاب
فى لجة عايشة الاغتراب
وطنا فى الزمن الهباب
زارعنو ما ارضا يبا ب
حارسنو بى ولدا يهتف قلبو من ذكر الله داب
اشبالنا واقفين فى الثغور بى هيبة سادين الف باب
——-
سلاحنا الشعبى ليه نعبى
كل الخلوق تشهد تجى
تلقى البلد مسنودة بالشعب الابى
دفاعنا الشعبى ياهو دي
يا عازة انتى بتجتبى
سانداهو دخريك من صبى
مالياهو بى حب الوطن
شايلاهو فى عينيك شجن
واهباهو للدين تحمى بيه
ذى زمرة سبقتو فى الذهاب
لى جنة تشتاق لى مجى
——-
دفاعنا الشعبى ياهو دى
يسند اسودك يا وطن
ساعة تحر الحارة ويتنادوا الكلاب
وكتين تضيق الدنيا وينعدمو الصحاب
عدوان عليك منكل جيهة يشد يجى
يتلاحم الجيش والدفاع وسودانا يصبح كل شى
شيبو وشبابو وكل زول يشمر ثيابو
عشان نقيف نحميهو من عدوان غبى
خاتمة
عزك ياوطن شايلنو فى حدق العيون مشروع امان
فى قلب ولدا فطن
شمر سواعد جدو قاصد للدفاع الشعبى
مجبول بيه مكتول فيه حن
ولدا همام من تب قام ماكل قلبو ولا وهن
شايل هموم وطنو التزام فى عقيدتو مركوز مامحن
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
