قلب بجرسو شوق
كتبهاالخير محجوب ، في 16 نوفمبر 2008 الساعة: 17:30 م
قلب بجرسو شوق
كيف بالله دى ما القلب البجرسو شوق
قلب ولدا محرقو توق
لى زمنا مضت ايامو شوقو الكاتمو شوق مطبوق
شوق فوق شوق لى ارضا وكت ما يطل عليك النيل
يرارى نخيلا روق فوق روق
وان ارخيت حبال سمعك
تحس قمريها يتفاصح مع ناسا يسوى القوق
وشوق الشوق شوق لى امو كاتلا شوق
فى جنباتا لى جنياتا القاعدين قريب والساكنين بعيد لى فوق
فعايلك يازمن فيهم اتشتت عقابهم فى البلاد ماروق
وشوق الشوق شوق لابوه قلع خلقاتو لبس غير صباح اغبش ضرع غنماتو مو محلوب
لفح مخلاتو شال السوق
وفى مخلاتو جاب السوق
وخير السوق موزع فينا حد مايجينا من مخلوق
شوق للبيت لكل البيت وليداتو وبنياتو وغينيماتو وشجيراتو وضرى الدناع وللواسوق
دى ما القلب الممردقو شوق
لى تربال مسربل بالسمح والفال
علق تورو فى الفجراوى للعشاوى طبق فجراوى سايق ارقوق
والجدول ومويته العكره تتمرتق وتصفى تروق
سبيل للقاشى والماشى والمندلى فايت ما فطر مريوق
ولى دحشا يبردع فى الخدار مطلوق
ولى ولدا يساسق من تحت لى فوق
وشوق فوق شوق للشتوى اب خدارا زين قمحنا الناكلو ليه نسوق
وللصيفى تقاتنا الفيه ماليها المريق مدفوق
والشايقنى لى زمن التساب يوماتى تلقاه البحر مذنوق
زبنتو تفور الراس والنفس مخنوق
وناسا فيه تتمترس تحاوشو هنا وتحاوشو هناك تحمى مروق
عشان ما يمشى للزارعنو خوفا من تكتلو المويه بىطينا وروح خازوق
دى ماالزارعنو دايرين يلحقوبو السوق
كيف دى ما قلبا بجرسو شوق
يكفكف دمعةالمغبون ضايق المره يهدا يروق
ويمسح راس وليد بت عازهمكسور الجناح ضاوىه اليتم محروق
مقنع لى بنات الحله امات القد الممشوق
محل مايمشلى يطلع يعاين تشرقو العبره محروق قلبو مابى يفوق
شوق مدفون لكل الناس فى اللى التحت والفوق
اها دى ما قلبا يحرقو شوق فى الدنيا الابت ماتروق
والله كل القلوب بجرسى شوق
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
